最惡毒的留言，偏偏出自一個互不相識嘅人。網絡世界，一個有人視自己為「宇宙大王」嘅地方。RubberBand 喺文案提到「每個人身邊都總會有些人，喜歡咬著某些熱門議題，發文發帖大抒己見、帶領風向、甚至會鎖定目標（更多時候是無目標）連環開炮；有時渴望引來可讓他們圍爐取暖的留言，或慣了慢慢被這些存在感供養着，不覺地自我膨脹起來。」世界係好荒謬，的確需要一個渠道抒發所想，但係唔係要連環狙擊？用最刻薄嘅言詞批評對象？
由「消息人士」發放有關消息，隨之出現嘅係一班三唔識七嘅鍵盤戰士，見人踩就踩，好似唔講一句會蝕底咁，仲要用比上一個留言者更爆嘅字眼、言詞，務求要令大家都認同佢、支持佢，尋求一啲現實之中得唔到嘅認同感。早喺2010年，「Hater」呢個字正式被收入牛津字典，意思係極端憎恨特定對象或事嘅人。只要而家一開Facebook、連登、IG，都會有成千上萬嘅haters留言，仲出咗「逢紅必反」定律，唔知係有人睇唔過人對方可以出名，定真係質疑佢成名嘅能力，總之就會有一堆唔識嘅人由上至下批評佢。
有人話haters喺心理學上憤怒，而憤怒係人類宇宙性嘅情緒，個個人都會有；「hater」又可以譯做「酸民」，簡單啲就係「葡萄」，唔抵得人哋可以咁有成就、地位，就會用嗰個人無咁好嘅一方面盡力攻擊，務求蓋過優點，帶起「反」嘅風向。「反」一個人對坐喺電腦前面嘅人有無影響？無㗎，純粹係參與過討論。但有無諗過呢啲未必準確嘅批評，甚至指控，對於對方嚟講就係一次又一次嘅傷害，建立緊嘅只係無形喺網絡上嘅膨脹，返返現實，都只係普通人一個。
宇宙大王其實係講緊《IQ博士》入面嘅反派「宇宙大王」，佢覺得自己講嘅係神級理論，但其實偏激又片面，亦容不下其他人的意見，就好似而家網上發言嘅人，容不下對事件嘅唔同睇法，只需要極力地反。
你又覺得咁樣嘅世界真係正確嗎？
歌手：RubberBand｜文：Victoria｜圖：許莉
原文刊於 AVOCARDO Facebook（2023 年 5 月 17 日）：查看 Facebook 原帖