per se 呢首歌淨係睇個名會以為係一首講冒失、蝦碌嘅人嘅歌，點知原來係講後悔。未睇MV之前，單聽歌詞，就知道係講關於一啲當時無及時行動嘅遺憾，但而家已經補救唔返。睇完MV，竟然故事係講緊中學生欺凌嘅故事，最後更有一方離開咗世界，但即使現今嘅另一方想補救、拯救、贖罪，都已經再無可能改變事實。
每個人都有做錯過事，有一啲錯誤係永遠唔會想俾人知，成為自己一世嘅秘密。可能呢件事只係微不足道嘅小事，但人就係因為自尊、害怕人哋嘅目光，唔習慣將錯誤展露俾人睇，只有收埋喺心底，萬一觸動到，會引起最深處嘅痛。呢首歌講緊嘅「秘密」係校園欺凌，歌曲無講到喺校園內發生過咩事，但相信每個人都唔多唔少腦入面會有畫面浮現，因為基本上每間學校都會發生欺凌事件。唔一定要去到拳打腳踢、《黑暗榮耀》式嘅欺凌，可能只係用語言嘲諷、朋友杯葛，都足以成為欺凌行為，令被欺凌者蒙上陰影。
MV入面嘅男主角（Zeno顧定軒）分別飾演學生同長大後成為都市人嘅2個階段，長大回望返學生時期嘅欺凌覺得後悔，但已經無補於事，只可以望住對方離開，自始成為一世嘅遺憾。MWYO青年辦公室喺上年嘅調查發現，有約43%中學生曾目睹言語欺凌、約40%中學生曾目睹同學孤立其他人，仲有36%中學生曾經目擊網絡欺凌，但作為旁觀者，佢們往往會因為朋輩壓力，未有伸出援手，令欺凌事件變本加厲。根據教育局調查亦都發現，喺2018/19學年錄得290名學生涉及唔同類別嘅校園欺凌個案；喺2020/21年度就跌至155宗，但有關數據只係涵蓋公營中學，再加上只包括咗由老師申報俾教育局嘅數字，可能有部份欺凌個案無上報到。細個嘅時候，可能一句無心嘅說話，成為咗攻擊別人嘅武器；要正視欺凌問題，就需要由學校、老師對學生嘅教育做起，至少令目擊欺凌嘅人可以阻止欺凌，先會令欺凌減少。
糊塗可能係唔記得咗啲嘢、亦都可以係做錯一件不可逆轉嘅事，現實係好殘酷、好黑暗，但要點樣直視黑暗，接受自己嘅一切，先係一生中最重要嘅課題。
歌手：per se｜文：Victoria｜圖：許莉
原文刊於 AVOCARDO Facebook（2023 年 5 月 24 日）：查看 Facebook 原帖